CHTU ಅಗ್ನಿ ಅವಘಡ: ಮೃತರ ಕುಟುಂಬಕ್ಕೆ ನೆರವು ಘೋಷಿಸಿದ MRPL
ಮಂಗಳೂರು: ಮಂಗಳೂರು ರಿಫೈನರಿ ಅಂಡ್ ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ (MRPL)ನ Coker Hydrotreater Unit (CHTU)ನಲ್ಲಿ ಸೆಪ್ಟೆಂಬರ್ 30, 2026ರಂದು ಸಂಭವಿಸಿದ ದುರದೃಷ್ಟಕರ ಅಗ್ನಿ ಅವಘಡದಲ್ಲಿ ಶ್ರೀ ಮನೀಶ್ ಕರ್ಕಾಡ ಅವರು ಮೃತಪಟ್ಟಿರುವುದಕ್ಕೆ MRPL ಆಡಳಿತ ಮಂಡಳಿ ತೀವ್ರ ಸಂತಾಪ ವ್ಯಕ್ತಪಡಿಸಿದೆ.
ಮೃತರ ಕುಟುಂಬ ಹಾಗೂ ಬಂಧು-ಬಳಗದವರಿಗೆ MRPL ಹೃತ್ಪೂರ್ವಕ ಸಂತಾಪ ಸೂಚಿಸಿದ್ದು, ಈ ಕಷ್ಟದ ಸಂದರ್ಭದಲ್ಲಿ ಕಂಪನಿಯು ಕುಟುಂಬದೊಂದಿಗೆ ದೃಢವಾಗಿ ನಿಂತಿದೆ ಎಂದು ತಿಳಿಸಿದೆ.
ಅಮೂಲ್ಯ ಜೀವವೊಂದರ ನಷ್ಟವನ್ನು ಯಾವುದೇ ಆರ್ಥಿಕ ನೆರವಿನಿಂದಲೂ ತುಂಬಲು ಸಾಧ್ಯವಿಲ್ಲವಾದರೂ, ಮೃತರ ಕುಟುಂಬಕ್ಕೆ ರೂ.90 ಲಕ್ಷ ಆರ್ಥಿಕ ನೆರವು ನೀಡಲು MRPL ನಿರ್ಧರಿಸಿದೆ.
ಇದರ ಜೊತೆಗೆ, ಕುಟುಂಬವು ಗ್ರೂಪ್ ಟರ್ಮ್ ಲೈಫ್ ಇನ್ಶೂರೆನ್ಸ್ (GTLI) ಅಡಿಯಲ್ಲಿ ಸುಮಾರು ರೂ.10 ಲಕ್ಷ ಹಾಗೂ ವರ್ಕ್‌ಮೆನ್ ಕಾಂಪೆನ್ಸೇಶನ್ ಪಾಲಿಸಿ (WCP) ಅಡಿಯಲ್ಲಿ ಸುಮಾರು ರೂ.20 ಲಕ್ಷ ಮೊತ್ತದ ಪ್ರಯೋಜನ ಪಡೆಯಲಿದೆ. ಇದರಿಂದ ಒಟ್ಟು ಆರ್ಥಿಕ ನೆರವು ಮತ್ತು ವಿಮಾ ಪ್ರಯೋಜನಗಳು ಸುಮಾರು ರೂ.1.20 ಕೋಟಿ ಆಗಲಿವೆ.
ದ್ವಿತೀಯ ಹಂತದ ಕಾರ್ಮಿಕ ವರ್ಗದ (Secondary Workforce) ಸಿಬ್ಬಂದಿಗೆ ಮೆಡಿಕ್ಲೇಮ್ ವಿಮೆ ಒದಗಿಸುವ ಕುರಿತು ಪ್ರಸ್ತಾವನೆ ಸಿದ್ಧಪಡಿಸಲಾಗುತ್ತಿದ್ದು, ಈ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ ಎಂದು MRPL ತಿಳಿಸಿದೆ. ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದ ಗೌರವಾನ್ವಿತ ಸಂಸದರು ಹಾಗೂ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿಯವರೊಂದಿಗೆ ಚರ್ಚಿಸಿದ ಬಳಿಕ ಪ್ರಸ್ತಾವನೆಯನ್ನು ಅಂತಿಮಗೊಳಿಸಲಾಗುವುದು.
ಪ್ರಸ್ತಾವಿತ ಮೆಡಿಕ್ಲೇಮ್ ವ್ಯವಸ್ಥೆಗೆ ಸಂಬಂಧಿಸಿದ ಪ್ರಕ್ರಿಯೆಯನ್ನು ಸುಮಾರು ನಾಲ್ಕು ವಾರಗಳೊಳಗೆ ಪೂರ್ಣಗೊಳಿಸುವ ನಿರೀಕ್ಷೆಯಿದೆ ಎಂದು MRPL ತಿಳಿಸಿದೆ.
ತನ್ನ ಕಾರ್ಯಾಚರಣೆಗಳಿಗೆ ಸಂಬಂಧಿಸಿದ ಎಲ್ಲ ಸಿಬ್ಬಂದಿಯ ಸುರಕ್ಷತೆ, ಆರೋಗ್ಯ ಮತ್ತು ಕಲ್ಯಾಣಕ್ಕೆ MRPL ಬದ್ಧವಾಗಿದೆ ಎಂದು ಪುನರುಚ್ಚರಿಸಿದ್ದು, ಬಾಧಿತ ಕುಟುಂಬಕ್ಕೆ ಸಾಧ್ಯವಿರುವ ಎಲ್ಲ ನೆರವನ್ನು ಮುಂದುವರಿಸುವುದಾಗಿ ತಿಳಿಸಿದೆ.