ಪೋರ್ಟ್ ಟೌನ್ಅಡ್ವಾನ್ಸ್ಡ್ ಟೋಸ್ಟ್ ಮಾಸ್ಟರ್ಸ್ ಕ್ಲಬ್ ಅಧ್ಯಕ್ಷರಾಗಿ ಲೈರಾ ಪಿಂಟೊ
ಮಂಗಳೂರು : ಪೋರ್ಟ್ ಟೌನ್ಅಡ್ವಾನ್ಸ್ಡ್ ಟೋಸ್ಟ್ ಮಾಸ್ಟರ್ಸ್ ಕ್ಲಬ್ಬಿನ ಅಧ್ಯಕ್ಷೆ ಲೈರಾ ಪಿಂಟೊ ನೇತೃತ್ವದ ನೂತನ ಪದಾಧಿಕಾರಿಗಳ ಆನ್‌ಲೈನ್‌ಪದಗ್ರಹಣ ಸಮಾರಂಭವು 2020 ಜುಲೈ 11 ರ ಶನಿವಾರ ನಡೆಯಿತು.
ಈ ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿ ಟೋಸ್ಟ್ಮಾಸ್ಟರ್ಸ್ ಆಗ್ನೇಯ ಪ್ರದೇಶದ ವಿಶ್ವ ಆರೋಗ್ಯ ಸಂಸ್ಥೆ(ಡಬ್ಲ್ಯುಎಚ್‌ಒ) ನಿವೃತ್ತ ಪ್ರಾದೇಶಿಕ ಸಲಹೆಗಾರ ಡಾ. ಡೆರೆಕ್ ಲೋಬೊ ಭಾಗವಹಿಸಿದ್ದರು.
“ಸಾಂಕ್ರಾಮಿಕ ರೋಗಗಳನ್ನು ಎದುರಿಸಲು ಭಾರತದಂತಹ ಬಹುಸಾಂಸ್ಕೃತಿಕ ಮತ್ತು ಬಹು ಜನಾಂಗೀಯ ದೇಶಕ್ಕೆ ಸಾಂಕ್ರಾಮಿಕ ರೋಗಗಳ ಬಗ್ಗೆ ಆಳವಾದ ತಿಳುವಳಿಕೆ ಮತ್ತು ವಿಶ್ಲೇಷಣೆ ಅಗತ್ಯವಿದೆ ಎಂದು” ಮುಖ್ಯ ಅತಿಥಿ ಡಾ. ಡೆರೆಕ್ ಲೋಬೊ ಒತ್ತಿ ಹೇಳಿದರು. ಸಾಂಕ್ರಾಮಿಕ ರೋಗವು ನಮ್ಮೆಲ್ಲರಿಗೂ ಪರಸ್ಪರ ತಲುಪುವ ಮಹತ್ವದ ವಿಭಿನ್ನ ದೃಷ್ಟಿಕೋನವನ್ನು ಒದಗಿಸಿದೆ ಎಂದು ಅವರು ಹೇಳಿದರು. ಜನರ ಯೋಗಕ್ಷೇಮವನ್ನು ನಾವು ಪ್ರಾಮಾಣಿಕವಾಗಿ ನೋಡಿಕೊಳ್ಳಬೇಕಾಗಿದೆ ಎಂದು ತೃತೀಯ ಜಗತ್ತಿನ ದೇಶಗಳಿಗೆ, ವಿಶೇಷವಾಗಿ ಕುಷ್ಠರೋಗದಂತಹ ಕಾಯಿಲೆಗಳಿಗೆ ಸಂಬಂಧಿಸಿದಂತೆ ಸಹಾಯವನ್ನು ನೀಡುವಲ್ಲಿ ಮುಂಚೂಣಿಯಲ್ಲಿರುವ ಹಲವಾರು ಅಂತರಾಷ್ಟ್ರೀಯ ಸಂಸ್ಥೆಗಳ ಸದಸ್ಯರಾಗಿ ಅವರ ಅನುಭವಗಳಿಂದ ಹೇಳಿದರು.
ಟೋಸ್ಟ್ಮಾಸ್ಟರ್ಸ್ ಏರಿಯಾ ಎಫ್ 4 ನಿರ್ದೇಶಕಿ ಜ್ಯೋತಿಕಾ ಶೆಟ್ಟಿ ಅವರು ಅಧ್ಯಕ್ಷೆ ಲೈರಾ ಪಿಂಟೊ ನೇತೃತ್ವದ 2020-21ರ ಹೊಸ ಪದಾಧಿಕಾರಿಗಳ ತಂಡಕ್ಕೆ ಪ್ರಮಾಣ ವಚನ ಬೋಧಿಸಿದರು. ತಂಡದಲ್ಲಿ ಅಮಿತಾ ಶೆಟ್ಟಿ (ಉಪಾಧ್ಯಕ್ಷ – ಶಿಕ್ಷಣ), ಅನ್ವೇಶ್ ಶೆಟ್ಟಿ (ಉಪಾಧ್ಯಕ್ಷ – ಸದಸ್ಯತ್ವ), ಫ್ರೆನಿಲ್ ಡಿಸೋಜ (ಉಪಾಧ್ಯಕ್ಷ – ಸಾರ್ವಜನಿಕ ಸಂಪರ್ಕ), ರಾಧಿಕಾ ಅಡಪ್ಪ (ಕಾರ್ಯದರ್ಶಿ), ಶಿವಾನಿ ಬಾಳಿಗ (ಖಜಾಂಚಿ) ಮತ್ತು ಬ್ರಿಯಾನ್ ಫರ್ನಾಂಡಿಸ್ ( ಸಾರ್ಜೆಂಟ್-ಅಟ್-ಆರ್ಮ್ಸ್) ಅವರಿದ್ದಾರೆ.
ಡಾ ಆಲಿವರ್ ಡಿಸೋಜಾ ಪರಿಚಯಿಸಿದರು. ಮಾರಿಯಾ ಡಿ ಕೋಸ್ಟಾ ಪ್ರಾರ್ಥನೆ ಸಲ್ಲಿಸಿದರು. ಗೀತಾ ಪಿರೇರಾ ಸ್ವಾಗತಿಸಿದರು ಮತ್ತು ಡಾ. ಚಂದ್ರ ಕುಮಾರ್ ಬಲ್ಲಾಲ್ ಅವರು ವಾರ್ಷಿಕ ವರದಿಯನ್ನು ಪವರ್ ಪಾಯಿಂಟ್ ಮೂಲಕ ಮಂಡಿಸಿ ಕಳೆದ ವರ್ಷದಲ್ಲಿ ಕ್ಲಬ್ ಸಾಧಿಸಿದ ಸಾಧನೆಗಳನ್ನು ವಿವರಿಸಿದರು.
ಫ್ರಾನ್ಸಿಸ್ ಪಿಂಟೊ ಮುಖ್ಯ ಅತಿಥಿಯನ್ನು ಪರಿಚಯಿಸಿದರು. ಮಾಲಿನಿ ಹೆಬ್ಬಾರ್ ಅವರು ಹಳೆಯ ತಂಡದಿಂದ ಹೊಸ ತಂಡಕ್ಕೆ ಅಧಿಕಾರ ಹಸ್ತಾಂತರದ ವೀಡಿಯೊವನ್ನು ಪ್ರಸ್ತುತಪಡಿಸಿದರು.
ಭಾರತಿ ಶೆವ್‌ಗೂರ್ ಅವರು ಲೈರಾ ಪಿಂಟೊ ಅವರನ್ನು ಪರಿಚಯಿಸಿದರು. ಶಿವಾನಿ ಬಾಳಿಗ ಅವರು ಏರಿಯಾ ನಿರ್ದೇಶಕಿ ಜ್ಯೋತಿಕಾ ಶೆಟ್ಟಿಯನ್ನು ಪರಿಚಯಿಸಿದರು.
ನಿಕಟಪೂರ್ವ ಅಧ್ಯಕ್ಷೆ ಪ್ರೀತಮ್ ಕಾಮತ್ ತಮ್ಮ ಅಧಿಕಾರಾವಧಿಯಲ್ಲಿ ತಮ್ಮ ತಂಡ ಮತ್ತು ಕ್ಲಬ್ ಸದಸ್ಯರ ಸಹಕಾರಕ್ಕೆ ಧನ್ಯವಾದಗಳನ್ನು ಅರ್ಪಿಸಿದರು. ಪದಗ್ರಹಣ ಭಾಷಣ ಮಾಡಿದ ಲೈರಾ ಪಿಂಟೊ ತನ್ನ ಗುರಿ ಮತ್ತು ಸಾಧನೆ ಆಶಯ ವ್ಯಕ್ತಪಡಿಸಿದರು. ಅನು ಶರ್ಮಾ ಮತ್ತು ಡಾ.ವೀಣಾ ಅವರನ್ನು ವಿಭಾಗ ಎಫ್ ನಿರ್ದೇಶಕ ಮೊಲಿ ಚೌಧರಿ ಕ್ಲಬ್ಬಿಗೆ ಸೇರ್ಪಡೆಗೊಳಿಸಿದರು. ಫ್ರೆನಿಲ್ ಡಿಸೋಜಾ ಮತ್ತು ಅನ್ವೇಶ್ ಶೆಟ್ಟಿ ಅವರಿಬ್ಬರನ್ನು ಕ್ಲಬ್‌ಗೆ ಪರಿಚಯಿಸಿದರು.
ಜಿಲ್ಲಾ ಕ್ಲಬ್ ಬೆಳವಣಿಗೆಯ ನಿರ್ದೇಶಕಿ ಸವಿತಾ ಸಾಲಿಯನ್, ವಿಭಾಗ ಎಫ್ ನಿರ್ದೇಶಕಿ ಮೊಲಿ ಚೌಧರಿ, ಪ್ರದೇಶ ನಿರ್ದೇಶಕರಾದ ಸಪ್ನಾ ಶೆಣೈ, ದೀಪಾ ಭಂಡರಿ ಮತ್ತು ಜ್ಯೋತಿಕಾ ಶೆಟ್ಟಿ ಮತ್ತು ವಿಭಾಗ ಎಫ್‌ನ ಕ್ಲಬ್‌ಗಳ ಅಧ್ಯಕ್ಷರು, ಪ್ರತಿನಿಧಿಗಳು ಹೊಸ ಪದಾಧಿಕಾರಿಗಳನ್ನು ಅಭಿನಂದಿಸಿದರು.
ಹೊಸ ಅಧ್ಯಕ್ಷರ ಪತಿ ರಿಚರ್ಡ್ ಪಿಂಟೊ ಮತ್ತು ಮಗಳು ಕುಮ್ ಕುಮ್ ಅವರನ್ನು ಬ್ರಿಯಾನ್ ಫೆರ್ನಾಂಡಿಸ್ ಅವರು ಸನ್ಮಾನಿಸಿದರು. ರಾಧಿಕಾ ಅಡಪ್ಪ ವಂದಿಸಿದರು. ವಿದ್ಯಾ ಶೆಣೈ ಮತ್ತು ಅಮಿತಾ ಶೆಟ್ಟಿ ಕಾರ್ಯಕ್ರಮ ನಿರ್ವಹಿಸಿದರು.
